பெட்டாலிங் ஜெயா, நவ 10: இன்று 2025-2035 குறைந்த கார்பன் கட்டிடம் செயல் திட்டத்தை (Pelan Tindakan Bangunan Rendah Karbon) பெட்டாலிங் ஜெயா மாநகராட்சி (எம்பிபிஜே) அதிகாரப்பூர்வமாக அறிமுகப்படுத்தியது.
இந்தத் திட்டம், பெட்டாலிங் ஜெயாவை அடுத்த ஐந்து ஆண்டுகளில் குறைந்த கார்பன் நகரமாக மாற்றும் இலக்குடன் உருவாக்கப்பட்டுள்ளது. இது நகரத்தின் சுற்றுச்சூழல் நிலைத்தன்மையை மேம்படுத்தும் நீண்டகால முயற்சியாகும்.
இந்தத் திட்டம் பசுமை நகர மாற்றத்திற்கான ஒரு முக்கியமான வழிகாட்டியாகும். இது நகர வளர்ச்சியை சுற்றுச்சூழலுக்கு உகந்த திசையில் நகர்த்தும் என்று மேயர் டத்தோ முகமட் சாஹரி சமிகோன் கூறினார்.
இந்த திட்டம் கட்டிடங்களில் மின்சார பயன்பாடு மற்றும் சக்தி திறனை மேம்படுத்தும் நோக்கத்துடன் அமல்படுத்தப்படும். இது சரியான தரநிலைகள் மற்றும் ஒழுங்குமுறைகளின் அடிப்படையில் செயல்படுத்தப்படும் என்றும் அவர் தெரிவித்தார்.
இந்த திட்டங்கள் கார்பன் வெளியேற்றத்தை குறைத்து, நகரத்தின் காலநிலை மாற்றத்திற்கான சக்தியையும் அதிகரிக்கும். இதன் மூலம் பெட்டாலிங் ஜெயா ஒரு பாதுகாப்பான மற்றும் சுத்தமான நகரமாக மாறும் என அவர் தெரிவித்தார்.
“எம்பிபிஜே பசுமை மாற்றத்தை முன்னெடுக்க உறுதியாக செயல்படுகிறது. இதன்மூலம் பெட்டாலிங் ஜெயா ஒரு நிலைத்தன்மை வாய்ந்த, முன்னேற்றம் அடைந்த மற்றும் போட்டித்திறன் கொண்ட குறைந்த கார்பன் நகரமாக உருவாகும்,” என்று அவர் கூறினார்.
அவர் மேலும் தெரிவித்ததாவது, இந்த இலக்கு அரசு அமைப்புகள், தனியார் துறை மற்றும் உள்ளூர் சமூகங்களின் ஒத்துழைப்பின் மூலம் மட்டுமே அடைய முடியும். சமூகத்தின் பங்காற்றல் இந்த முயற்சியின் வெற்றிக்கான முக்கிய அம்சமாகும் என்று அவர் வலியுறுத்தினார்.
எம்பிபிஜே மத்திய அரசின் 2030க்குள் 45% கார்பன் குறைப்பு இலக்கை முழுமையாக ஆதரிக்கிறது. பெட்டாலிங் ஜெயாவிலும் 33% கார்பன் குறைப்பை அதே காலக்கட்டத்தில் அடைவதை நோக்கமாகக் கொண்டுள்ளது.
கடந்த வாரம், மாநில அரசின் கொள்கைகள் மற்றும் திட்டங்கள் அனைத்தும் நிலைத்தன்மை வளர்ச்சி இலக்குகள் (SDG) அடிப்படையில் செயல்படுத்தப்பட்டுள்ளன என சிலாங்கூர் மாநில மந்திரி புசார் டத்தோ ஸ்ரீ அமிருடின் ஷாரி கூறினார். இதன் மூலம் பொருளாதார வளர்ச்சி மற்றும் மக்களின் நலன் சமநிலையாக முன்னேறும் என்றார்.
