சிங்கப்பூர், பிப். 12 – 2018 ஆம் ஆண்டு போதைப்பொருள் கடத்தல் வழக்கில் தண்டனை பெற்ற மலேசியரான லிங்கேஸ்வரன் ராஜேந்தரனுக்கு நேற்று சிங்கப்பூரில் மரண தண்டனை நிறைவேற்றப்பட்டதாக அந்நாட்டின் மத்திய போதைப்பொருள் தடுப்பு பிரிவு (CNB) இன்று உறுதிப்படுத்தியது.
“லிங்கேஸ்வரன் ராஜேந்தரனுக்கு பிப்ரவரி 11 ஆம் தேதி மரண தண்டனை நிறைவேற்றப்பட்டது. விசாரணை மற்றும் மேல்முறையீட்டு நடவடிக்கைகளின் போது அவருக்கு உரிய சட்ட நடைமுறைகள் வழங்கப்பட்டன. மேலும், அவர் சார்பில் வழக்கறிஞர்கள் ஆஜரானார்கள்,” என்று CNB இன்று வெளியிட்ட அறிக்கையில் தெரிவித்துள்ளது.
33 வயதான லிங்கேஸ்வரன், குறைந்தது 52.77 கிராம் டயமோர்ஃபின் (diamorphine) கடத்தியதாகக் குற்றம் சாட்டப்பட்டு, அக்டோபர் 15, 2018 அன்று அவருக்கு மரண தண்டனை விதிக்கப்பட்டது. அவரது மேல்முறையீடு மார்ச் 27, 2019 அன்று மேன்முறையீட்டு நீதிமன்றத்தால் நிராகரிக்கப்பட்டது.
மேல்முறையீடு நிராகரிக்கப்பட்டதைத் தொடர்ந்து, லிங்கேஸ்வரன் எட்டு பிந்தைய மனுக்களை தாக்கல் செய்தார்; அவை அனைத்தும் தோல்வியடைந்தன. அவருக்கு மன்னிப்பு வழங்குமாறு ஜனாதிபதியிடம் தாக்கல் செய்யப்பட்ட கருணை மனுவும் நிராகரிக்கப்பட்டது.
சிங்கப்பூர் சிறைச்சாலை சேவையில் பொது அதிகாரிகள் தவறான நடத்தை, அலட்சியம் அல்லது கடமை தவறியதாகக் குற்றம் சாட்டி, பிப்ரவரி 9 அன்று லிங்கேஸ்வரனின் வழக்கறிஞர் சிவில் வழக்கு ஒன்றை தாக்கல் செய்ததாகவும் CNB தெரிவித்துள்ளது.
அந்த வழக்கு நிலுவையில் இருந்தபோதிலும், தூக்கு தண்டனையை ஒத்திவைக்குமாறு தாக்கல் செய்யப்பட்ட மனுவை மேன்முறையீட்டு நீதிமன்றம் நிராகரித்ததாகவும் CNB கூறியது.
– பெர்னாமா
