ஷா ஆலம், மார்ச் 24 – நாட்டில் நிலவி வரும் போலி முதலீட்டு மோசடிகள் (Investment Scams) பெரும் கவலையை ஏற்படுத்தியுள்ளன. இந்த ஆண்டின் முதல் இரண்டு மாதங்களில் மட்டும் மொத்தம் 1,459 மோசடி வழக்குகள் பதிவாகியுள்ளதாகப் புக்கிட் அமான் வணிகக் குற்றப் புலனாய்வுத் துறை (JSJK) தெரிவித்துள்ளது.
இத்துறைக்கான இயக்குநர் டத்தோ ருஷ்டி முகமது ஈசா கூறுகையில், கடந்த ஆண்டின் இதே காலக்கட்டத்துடன் ஒப்பிடுகையில், இந்த ஆண்டு மோசடி வழக்குகளின் எண்ணிக்கை 11 விழுக்காடு அதிகரித்துள்ளது என்றார்.
ஜனவரி முதல் பிப்ரவரி வரையிலான காலப்பகுதியில், பாதிக்கப்பட்ட மக்கள் இழந்த ஒட்டுமொத்தத் தொகை 188 மில்லியன் ரிங்கிட் என மதிப்பிடப்பட்டுள்ளது. பண இழப்பு முந்தைய காலங்களை விடச் சற்று குறைந்திருந்தாலும், மோசடி சம்பவங்களின் எண்ணிக்கை அதிகரித்து வருவது ஆபத்தான அறிகுறியாகும் என அவர் சுட்டிக்காட்டினார்.
மோசடி கும்பல்கள் பெரும்பாலும் வாட்ஸ்அப் (WhatsApp) மற்றும் டெலிகிராம் (Telegram) போன்ற சமூக ஊடகச் செயலிகள் மூலமாகவே மக்களை வலைவீசிப் பிடிக்கின்றன. "குறைந்த காலத்தில் அதிக லாபம்" என்ற கவர்ச்சிகரமான வாக்குறுதிகளை வழங்கி, டிஜிட்டல் தளங்கள் வாயிலாகப் பொதுமக்களை இந்தச் சிண்டிகேட்கள் ஏமாற்றி வருகின்றன.
அசாத்தியமான லாபத்தை உறுதி அளிக்கும் எந்தவொரு முதலீட்டுத் திட்டத்தையும் நம்பி பொதுமக்கள் ஏமாற வேண்டாம் என டத்தோ ருஷ்டி அறிவுறுத்தியுள்ளார். எந்தவொரு நிதிப் பரிமாற்றத்தையும் செய்வதற்கு முன்னதாக, சம்பந்தப்பட்ட நிறுவனத்தின் உண்மைத்தன்மை மற்றும் அங்கீகாரத்தை அதிகாரப்பூர்வத் தளங்களில் சரிபார்க்க வேண்டியது அவசியம்.
முதலீடு தொடர்பான முடிவுகளை எடுப்பதற்கு முன்பு, முறையான மற்றும் அங்கீகரிக்கப்பட்ட தளங்களிலிருந்து தகவல்களைப் பெறுவதன் மூலம் மட்டுமே இத்தகைய மோசடி வலைகளில் இருந்து தற்காத்துக் கொள்ள முடியும் என வணிகக் குற்றப் புலனாய்வுத் துறை மீண்டும் நினைவூட்டியுள்ளது.
