தாமஸ் கிண்ண பூப்பந்து போட்டியில், மலேசியா, ஜப்பான், இங்கிலாந்து, பின்லாந்து 'பி' பிரிவில்

கோலாலம்பூர், மார்ச் 19: டென்மார்க்கின் ஹார்சன்ஸ் நகரில் ஏப்ரல் 24 முதல் மே 3 வரை நடைபெறவுள்ள 2026-ஆம் ஆண்டுக்கான தாமஸ் கிண்ண பூப்பந்து போட்டியில், மலேசியா 'பி' பிரிவில் ஜப்பானுடன் இடம் பெற்றுள்ளது.

இன்று இங்குள்ள உலகப் பூப்பந்து சம்மேளனத்தின் (BWF) தலைமையகத்தில் நடைபெற்ற குழுநிலை குலுக்கலில், மலேசிய ஆடவர் அணி ஜப்பான், இங்கிலாந்து மற்றும் பின்லாந்து ஆகிய மற்ற இரண்டு ஐரோப்பிய அணிகளுடன் 'பி' பிரிவில் இடம் பிடித்துள்ளது.

காகிதத்தில், 2026-ஆம் ஆண்டுக்கான ஆசிய அணி சாம்பியனான ஜப்பான், ஒற்றையர் மற்றும் இரட்டையர் பிரிவுகளில் சமபலத்துடன் விளங்குவதால், தேசிய அணிக்கு கடுமையான சவாலாக அமையும். மாறாக, மலேசியாவின் உண்மையான சவால் ஒற்றையர் பிரிவின் நிலைத் தன்மையிலேயே தங்கியுள்ளது.

உலகின் 23-ஆம் நிலை வீரர் லியோங் ஜுன் ஹாவ், 38-ஆம் நிலை வீரர் ஜஸ்டின் ஹோ மற்றும் 86-ஆம் நிலை சுயேட்சை வீரர் லீ ஸீ ஜியா ஆகியோரைக் கொண்ட ஒற்றையர் அணி, இந்த பருவத்தில் சிறப்பான ஆட்டத்தை வெளிப்படுத்தவில்லை.

ஐரோப்பிய ஆடவர் அணிகள் பூப்பந்து சாம்பியன்ஷிப்பில் மூன்றாவது இடத்தைப் பிடித்த இங்கிலாந்து அணியிடமும் மலேசியா எச்சரிக்கையாக இருக்க வேண்டும். குறிப்பாக, அவர்களின் முன்னணி இரட்டையர் ஜோடியான பென் லேன்-சீன் வெண்டி, கடந்த காலத்தில் 2022-ஆம் ஆண்டு உலக சாம்பியன்களான ஆரோன் சியா-சோ வூ யிக் மற்றும் கோ ஸே ஃபெய்-நூர் இஸ்ஸுடின் ரும்சானி ஆகியோரை வீழ்த்தியுள்ளனர்.

இதனிடையே, 2026-ஆம் ஆண்டுக்கான ஊபர் கிண்ணப் போட்டியில் தேசிய மகளிர் அணிக்கு சாதகமான வாய்ப்பு கிடைத்துள்ளது.

ஆறு முறை சாம்பியனான ஜப்பான், துருக்கி மற்றும் தென்னாப்பிரிக்காவுடன் 'பி' பிரிவில் மலேசிய மகளிர் அணி இடம் பெற்றுள்ளது.

இந்தக் குலுக்கல் மூலம், துருக்கி மற்றும் தென்னாப்பிரிக்கா அணிகளுக்கு எதிராக உறுதியான வெற்றிகளைப் பதிவு செய்தால், 2010-ஆம் ஆண்டுக்குப் பிறகு முதல் முறையாக காலிறுதிச் சுற்றுக்கு முன்னேற தேசிய மகளிர் அணிக்கு பிரகாசமான வாய்ப்பு உள்ளது.

தாமஸ் மற்றும் ஊபர் கிண்ணப் போட்டிகளில் ஒவ்வொரு பிரிவிலும் முதல் இரண்டு இடங்களைப் பிடிக்கும் அணிகள் காலிறுதிக்கு தகுதி பெறும்.

மலேசியா கடைசியாக 1992-ஆம் ஆண்டு கோலாலம்பூரில் நடைபெற்ற தாமஸ் கிண்ணத்தை வென்றது. மகளிர் அணி இதுவரை ஊபர் கிண்ணத்தை வென்றதில்லை.

தாமஸ் மற்றும் ஊபர் கிண்ணம் 2026-க்கான முழுமையான குலுக்கல் விபரங்கள்:

தாமஸ் கிண்ணம்

பிரிவு A: சீனா, இந்தியா, கனடா, ஆஸ்திரேலியா

பிரிவு B: ஜப்பான், மலேசியா, இங்கிலாந்து, பின்லாந்து

பிரிவு C: தைவான், டென்மார்க், தென்கொரியா, சுவீடன்

பிரிவு D: இந்தோனேசியா, பிரான்ஸ், தாய்லாந்து, அல்ஜீரியா

ஊபர் கிண்ணம்

பிரிவு A: சீனா, இந்தியா, டென்மார்க், உக்ரைன்

பிரிவு B: ஜப்பான், மலேசியா, துருக்கி, தென்னாப்பிரிக்கா

பிரிவு C: தைவான், இந்தோனேசியா, கனடா, ஆஸ்திரேலியா

பிரிவு D: தென்கொரியா, தாய்லாந்து, பல்கேரியா, ஸ்பெயின்

- பெர்னாமா