ஷா ஆலம், மார்ச் 18 : எதிர்வரும் ஹரிராயா ஐடில்ஃபித்ரி கொண்டாட்டங்களை முன்னிட்டு, பொதுமக்கள் அவசரப்பட்டு அத்தியாவசியப் பொருட்களை அளவுக்கு அதிகமாக வாங்கிச் சேமிக்க வேண்டாம் என்று விவசாய மற்றும் உணவுப் பாதுகாப்பு அமைச்சர் டத்தோஸ்ரீ முகமட் சாபு கேட்டுக்கொண்டுள்ளார். நாட்டில் அடிப்படை உணவுப் பொருட்களின் இருப்பு போதுமான அளவில் இருப்பதை அவர் உறுதிப்படுத்தியுள்ளார்.
கோழி மற்றும் இறைச்சி விநியோகம் தற்போது சீராக உள்ளது, அதாவது அடுத்த சில மாதங்களுக்கான தேவையை நிறைவு செய்யும் வகையில் கையிருப்பு உள்ளதாக அவர் தெரிவித்தார்.
"வழக்கமாக நான்கு கோழிகளை வாங்குபவர்கள், இப்போதும் அதே அளவிலேயே வாங்குங்கள். தேவையற்ற முறையில் அதிகப்படியான பொருட்களை வாங்கிச் சேமிப்பதைத் தவிர்க்குமாறு" அவர் பொதுமக்களுக்கு அறிவுறுத்தினார். மே அல்லது ஜூன் மாதம் வரை, சபா மற்றும் சரவாக் உட்பட நாடு முழுவதும் இந்த விநியோகம் சீராக இருக்கும் என்றும் அவர் நம்பிக்கை தெரிவித்தார்.
இன்று நடைபெற்ற விவசாய அமைப்பின் (PPN) லாபப்பகிர்வு மற்றும் தேசிய விவசாய அமைப்பின் (NAFAS) 2026-ஆம் ஆண்டு நோன்பு துறப்பு நிகழ்வில் கலந்துகொண்ட போது அவர் இதனைத் தெரிவித்தார்.
மேற்கு ஆசியாவில் அமெரிக்கா, இஸ்ரேல் மற்றும் ஈரான் ஆகிய நாடுகளுக்கு இடையே நிலவும் பதற்றமான சூழலால், தற்போதைக்கு உள்நாட்டுப் பொருட்களின் விலையில் பெரிய மாற்றங்கள் ஏதும் இல்லை என்று அவர் விளக்கினார்.
இருப்பினும், எரிபொருள் விலையில் ஏற்படும் மாற்றங்களைப் பொறுத்து, அடுத்த மூன்று அல்லது நான்கு மாதங்களில் இந்த உலகளாவிய மோதல்களின் தாக்கம் விலையேற்றமாகப் பிரதிபலிக்கக்கூடும் என்று அவர் எச்சரித்தார்.
"பெட்ரோல் விலை உயரும்போது மற்ற பொருட்களின் விலையிலும் மாற்றம் ஏற்பட வாய்ப்புள்ளது, ஆனால் அது உடனடியாக நிகழாது. இப்போது சந்தையில் இருப்பவை ஏற்கனவே கையிருப்பில் உள்ள பொருட்கள் என்பதால் பொதுமக்கள் கவலைப்படத் தேவையில்லை," என்றும் அவர் கூறினார்.
நிலைமையைக் கண்காணிக்க நிதி அமைச்சகம் மற்றும் முதலீடு, வர்த்தகம் மற்றும் தொழில்துறை அமைச்சகம் (MITI) ஆகியவற்றுடன் இணைந்து அரசாங்கம் தொடர்ந்து செயல்படும் என்றும் அவர் உறுதியளித்தார்.
