ஷா ஆலாம், பிப் 5- ஷா ஆலம், செக்ஷன் 14-இன் புதிய மையமாக அனேகா வாக் (Aneka Walk) எனும் நவீன வாழ்க்கை முறை மையம் உருவாகவுள்ளது. இது சிலாங்கூர் மாநில மேம்பாட்டுக் கழகத்தின் (PKNS) முக்கிய நகரப் புத்துயிர் திட்டமான SA சென்ட்ரலின் ஒரு பகுதியாகும்.
ஷா ஆலம் நகர மையத்தை மேம்படுத்தும் இத்திட்டம், சுமார் 58.6 ஹெக்டேர் (ஏறக்குறைய 143 ஏக்கர்) பரப்பளவைக் கொண்டுள்ளது மற்றும் இதன் மொத்த மேம்பாட்டு மதிப்பு (GDV) சுமார் 3 பில்லியன் ரிங்கிட் என மதிப்பிடப்பட்டுள்ளது.
தற்போதுள்ள முக்கியச் சொத்துக்கள் மற்றும் சுற்றியுள்ள பகுதிகளை மேம்படுத்துவதன் மூலமும், குடியிருப்பு, விருந்தோம்பல் மற்றும் வாழ்க்கை முறை உள்ளிட்ட புதிய அம்சங்களை அறிமுகப்படுத்துவதன் மூலமும், ஷா ஆலாம் நகர மையத்தை எதிர்காலத் தலைமுறையினருக்காகத் துடிப்பான, வாழத்தகுந்த மற்றும் பொருளாதார ரீதியில் நீடித்த ஒரு நகர்ப்புற மையமாக மாற்றுவதே SA சென்ட்ரலின் நோக்கமாகும்.
இந்த இலக்கின் அடிப்படையில், வர்த்தகம், கலாச்சாரம், பொழுதுபோக்கு மற்றும் சமூகத்தை ஒரே நவீன வணிக மையத்தில் இணைக்கும் ஒரு துடிப்பான இடமாக அனேகா வாக் வடிவமைக்கப்பட்டுள்ளது.
ஷா ஆலம் நகர மையத்தில் அமைந்துள்ள அனேகா வாக், பிகேஎன்எஸ் ஷா ஆலாம் வளாகம், எஸ்ஏசிசி மால் மற்றும் ஷா ஆலாம் மாநாட்டு மையம் உள்ளிட்ட நகரின் பல முக்கிய இடங்களுக்கு நேரடி மற்றும் இணைக்கப்பட்ட அணுகலை வழங்குகிறது.
டத்தோ மந்திரி எல்ஆர்டி 3 நிலையத்திலிருந்து வெறும் 150 மீட்டர் தொலைவில் அமைந்திருப்பதால், அன்றாடப் பயணிகள், சுற்றுலாப் பயணிகள் மற்றும் உள்ளூர் சமூகத்தினர் இதை எளிதில் அணுக முடியும். பாதசாரிகளுக்கு ஏற்ற நடைபாதைகள் மற்றும் கூரையுடன் கூடிய இணைப்புகள் ஆண்டு முழுவதும் பார்வையாளர்களுக்கு வசதியை உறுதி செய்கின்றன.
