லுமுட், பிப் 3: பங்கோர் தீவிற்கு அருகிலுள்ள தெலுக் நிப்பா கடற்கரையில், கடல் நீர் மட்டம் குறைந்து 'கடல் பிளவு' போன்ற இயற்கை நிகழ்வு ஏற்பட்டதையடுத்து, கியாம் தீவை இணைக்கும் 400 மீட்டர் மணல் திட்டில் சுமார் 3,000-க்கும் மேற்பட்ட சுற்றுலாப் பயணிகள் உற்சாகமாக நடந்து சென்றனர்.
இன்று முதல் மூன்று நாட்களுக்கு நீடிக்கும் என எதிர்பார்க்கப்படும் இந்த அதிசய நிகழ்வை, சுற்றுலாப் பயணிகள் சுமார் ஒன்றரை மணி நேரம் கண்டு ரசித்தனர் என்று மஞ்சோங் நகராட்சி மன்றத்தின் வரிவிலக்கு தீவு மேலாண்மைப் பிரிவின் இயக்குனர் அனாஸ் மாலெக் இஷாக் கூறினார். சுற்றுலாப் பயணிகளின் பாதுகாப்பை உறுதி செய்ய மலேசியப் காவல்துறை, தீயணைப்பு மற்றும் மீட்புத் துறை, பொது பாதுகாப்புப் படை மற்றும் மீன்வளத் துறை ஆகியவற்றுடன் நகராட்சி மன்றம் இணைந்து செயல்படுவதாகவும் அவர் குறிப்பிட்டார்.
"மணல் திட்டில் நடந்து செல்லும்போது சுற்றுலாப் பயணிகள் கடல் அட்டைகள், பவளப்பாறைகள், கணவாய் மீன்கள் மற்றும் பல்வேறு கடல் வாழ் உயிரினங்களைக் காண முடிகிறது. சில நேரங்களில் கவனக்குறைவாக அவற்றின் மீது மிதித்துவிடவும் வாய்ப்புள்ளது. கடல் நீர் மட்டம் மீண்டும் உயரத் தொடங்கும்போது, அசம்பாவிதங்களைத் தவிர்க்கும் பொருட்டு தீயணைப்புத் துறையினரும் பொது பாதுகாப்புப் படையினரும் எச்சரிக்கை ஒலி எழுப்பி சுற்றுலாப் பயணிகளைக் கரைக்குத் திரும்புமாறு அறிவுறுத்துவார்கள்," என்று அவர் விளக்கினார்.
இந்த மூன்று நாள் நிகழ்வின் போது அவசர நிலைகளை எதிர்கொள்ள 10 அதிகாரிகள் மற்றும் அவசர மருத்துவச் சேவை உள்ளிட்ட மூன்று மீட்பு வாகனங்கள் தயார் நிலையில் வைக்கப்பட்டுள்ளதாக பங்கோர் தீவு தீயணைப்பு மற்றும் மீட்பு நிலையத்தின் தலைவர் முகமட் சைபுல் பஹ்ரி அப்துல் தாலிப் தெரிவித்தார். நீர் மட்டம் 0.3 முதல் 0.4 மீட்டர் வரை இருக்கும்போது மட்டுமே மக்கள் அனுமதிக்கப்படுவதாகவும், மதியம் நீர் மட்டம் வேகமாக உயரும் என்பதால் மக்கள் உடனடியாகக் கரைக்குத் திரும்புமாறு கேட்டுக் கொள்ளப்படுவதாகவும் அவர் கூறினார்.
பங்கோர் காவல் நிலையத் தலைவர் இன்ஸ்பெக்டர் முகமட் ஃபைசோல் கமலூடின் கூறுகையில், சுற்றுலா காவல்துறை உட்பட 17 அதிகாரிகள் இப்பணியில் ஈடுபட்டுள்ளதாகத் தெரிவித்தார். குறிப்பாக, பெற்றோர் தங்கள் குழந்தைகளைக் கண்காணிப்பதிலும், சுற்றுலாப் பயணிகள் தங்கள் உடைமைகளைப் பாதுகாப்பதிலும் கூடுதல் கவனம் செலுத்த வேண்டும் என அவர் வலியுறுத்தினார்.
