சுற்றுச்சூழல் நிலைத்தன்மைக்கு ஆதரவு: சிலாங்கூர் மாநிலத்தில் தொழில் துறையினருக்கு ஊக்கத்தொகை

ஷா ஆலாம், நவ 25-  சுற்றுச்சூழல் நிலைத்தன்மை திட்டமான சிலாங்கூர் மறுசுழற்சி (SELKitar) நிகழ்ச்சித்திட்டத்திற்கு ஆதரவு வழங்கும் தொழில்துறை நிறுவனங்களுக்கு மாநில அரசாங்கம் ஊக்கத்தொகைகளை வழங்கவுள்ளதாக சிலாங்கூர் மாநில மந்திரி புசார் டத்தோஸ்ரீ அமிருடின் ஷாரி அறிவித்துள்ளார்.

மாநில நிர்வாகம் அல்லது உள்ளூராட்சிகள் (PBT) மூலம் வழங்கப்படும் இந்தச் சலுகை, முதல் சிலாங்கூர் திட்டத்தில் (RS-1) கோடிட்டுக் காட்டப்பட்டுள்ள இலக்கு மறுசுழற்சி விகிதத்தை மாநிலம் அதிகரிக்க உதவும் என்று அவர் தெரிவித்தார்.

"இந்த மூலோபாயப் பங்காளிகளின் முயற்சியை நான் வரவேற்கிறேன். இதில் சம்பந்தப்பட்ட தரப்பினருக்கு என்ன வகையான சலுகைகள் அல்லது முன்முயற்சிகள் வழங்கப்படலாம் என்பதை நாங்கள் ஆராய்வோம், ஏனெனில் அவர்கள் சொந்த நிதியைப் பயன்படுத்துகிறார்கள்.

SELKitar திட்டத்தில் நேரடியாகவோ அல்லது மறைமுகமாகவோ மேலும் பல தரப்பினரை ஈடுபடுத்துவதற்கு இது ஒரு சில சலுகைகள் அல்லது பிற நன்மைகளுடன் சமப்படுத்தப்படலாம்," என்று அவர் இன்று மாநில நிர்வாகக் கட்டிடத்தில் SELKitar திட்டத்தின் தொடக்க நிகழ்வு மற்றும் செயல்பாட்டு லோரிகள் விநியோக நிகழ்விற்குப் பிறகு செய்தியாளர்களிடம் தெரிவித்தார்.

KDEB கழிவு முகாமைத்துவத்தால் இயக்கப்படும் இந்தத் திட்டம், ஏப்ரல் மாதம் சில உள்ளூராட்சி அதிகாரசபைகளில் ஒரு முன்னோடித் திட்டமாகத் தொடங்கப்பட்டது. இது Nestle Malaysia மற்றும் Media Selangor உடன் இணைந்து தற்போது Klang WasteCare நிறுவனத்தையும் உள்ளடக்கியுள்ளது.

அக்டோபர் 1 ஆம் திகதி முதல், சபாக் பெர்ணம் தவிர மற்ற அனைத்து உள்ளூராட்சி அதிகாரசபைகளிலும் SELKitar செயற்பாடு தொடங்கப்பட்டுள்ளதுடன், மறுசுழற்சிப் பொருட்களைச் சேகரிக்க 21 பிரத்தியேக லோரிகள் பயன்படுத்தப்படுகின்றன.

"இதுவரை, 412,812 வீடுகள் அல்லது வளாகங்கள் இந்தத் திட்டத்தில் ஈடுபட்டுள்ளன. இன்ஷா அல்லாஹ், அடுத்த ஆண்டு அனைத்து மாவட்டங்களிலும் இலத்திரனியல் கழிவுகளை (e-waste) உள்ளடக்குவதற்கு நாங்கள் இந்தத் திட்டத்தை தீவிரப்படுத்துவோம். அடிப்படையில், SELKitar திட்டத்தின் மூலம் மறுசுழற்சி விகிதமானது 12 சதவீதத்தில் இருந்து 16 சதவீதமாக அதிகரித்துள்ளது.

இது RS-1 இலக்கை தாண்டியுள்ளது. இது ஒரு சிறிய முயற்சியே, வீடுகளில் 30 சதவீதம் அல்லது 50 சதவீதம் மறுசுழற்சியை அடைய நாங்கள் மேலும் சிந்திப்போம்," என்று அவர் கூறினார். கழிவுகளை மூலத்திலேயே பிரித்தெடுத்தல் மற்றும் பங்குதாரர்களின் கூட்டுப் பொறுப்பு ஆகியவற்றில் கவனம் செலுத்துவதன் மூலம் சுழற்சி பொருளாதார (Circular Economy) நடைமுறைகளை மேம்படுத்துவதற்கான நீண்ட கால முயற்சியாக SELKitar திட்டம் ஏப்ரல் மாதம் தொடங்கப்பட்டது.